S Glacemännli vo Arlese
Es isch emol es italiänischs Glacemännli gsi, dr Herr Del Medico. Dä het es fahrbars Glacewägeli gha und isch allewil gärn nach Arlese cho, wo er Alt und Jung sini Glace verkauft het.
Bsunders am Sunntig, wenn Arleser und Uswärtigi in d Ermitage gströmt sin, um i dem alte änglische Landschaftsgarte z spaziere, isch är rächtzitig barat gstande und het Glacebölle abotte: Zitro, Vanille, Ärdbeer, Pistasch, Schoggi und Banane. Jetzt isch es aber e so, dass es e Bewilligung bruucht, wenn öpper uf dr Allmänd will Sache verkaufe. Das isch jo au verständlich. Das het s Glacemännli vom Dorfpolizischt, em Herr Fiechter (das isch dä mit em rassige Töff), erfahre, und so het äs denn e sone Erlaubnis beaträit. Und in de Summerferie het me im Wucheblettli kenne läse, dass s Glacemännli die Bewilligung bicho het. Bis es so wit gsi isch, het es bi dr Frau Jenzer ihrem Spilziglade an dr Ermitagestrooss sis Wägeli chönne anestelle. Ufeme Privatplatz bruchts jo allewil nie ghai staatlichi Erlaubnis.
Jetzt isch alles in beschter Ornig, het me sich im Dorf dänkt. - Bis me erfahre het, dass dr Gmaindroot vom Glacemännli sovil Gäld het welle für d Bewilligung, dass es allewil pro Monet dr Umsatz vo ebbe hundertfuffzig Bölle Glace hätti miesse dr Gmaind abgä. Das isch em Glacemännli scho-n-es bitzeli zvil gsi.
So isches denn cho, dass es witerhin bi Private het sis Wägeli derfe ufstelle. Vo dr Tramstation bis hindere in d Ermitage het s Glacemännli verschideni Plätzli bi Private gfunde, wo-n-es sini Glacebölle verchaufe cha. So wie hüt, am Mühlebodewäg. Und unsere Herr Fiechter luegt guet, dass au kai Reedli vo dem Wägeli uf Gmaindsbode stoht. So isch d Glacewält im Dorf wider in Ornig.
wanderer - 16. Sep, 17:16
